囍

尋日(26/9)去飲，著得比平日隆重，基於尊重場合，尊重新娘，知道大家睇唔慣，可能因為我平日返工著得太causual啦。撞著星期一埋稿日，遲0左係一個小遺憾，無正式同佢用大機影相，好彩趕及睇佢出場，新娘模樣同平日果然好唔同，恭喜您﹗ 每次0係婚禮睇新人0既「發展回憶照晒冷」，唔知點解都會好感動，雖然唔關我事，哈哈﹗不過我到呢一刻都仲係幾唔鍾情鋪張0既婚禮， 都明白好多0野自己唔可以控制，但係點降一 定要向父母、親戚交待，將資源、精神放0係主角身上，唔係更重要咩？ 去一場浩浩蕩蕩0既長途旅行/去一個與世隔絕feel0既地方住一排/請最close0既人食餐豪飯.....咁celebrate都幾好啊﹗唔知遲d我仲會唔會咁講呢......
p.s.相中包圍住新婚0既係一班餓狼似的男同事，亦應該係全個婚禮著得最有"態度"0既一群，而且，係最嘈0個堆﹗

我諗我係旺角系﹗通常0係銅、尖、中工作，所以好少去旺角，星期六、日就更少踏足呢片「雜土」，人多、嘈雜程度太得人驚。今日去旺角寓工作於購物，因為想去買碟，結果唔覺唔覺咁買下買下，就買0左1隻cd、2隻vcd、2本書、1盒仔puzzle、幾件無聊擺設、重有一堆仔零食，好似餓0左好耐咁，mk，呢排都係唔搵你住，買呢埋0野都洗0左我一筆啊﹗

毋忘我，係我最鍾意0既花，因為佢個名好有意思、因為係我最like0既紫色，因為佢生命力好強，雖然一直被視為陪襯品，但係我覺得佢至係主角，起碼我拋棄成束玫瑰，都未放棄佢，當乾花都得。為0左表示對師兄們0既謝意，決定繼續擺你0地上檯。

老細明天開始放大假，好羨慕。係唔係會free d？未必，都係咁做，可能仲會有d亂添，希望平平安安，順利過渡。

好多0野都唔明，以為自己看穿了，說穿了，可能係自己諗多0左。

平淡一周

又到星期六，放假，今個星期無乜太特別0既事發生。平淡，都係好事。

星期二晚同同事預祝生日，發覺都好耐無參與過呢類聯誼活動，可能因為戒0左猜枚骰盅，所以都係無所事事咁，不過一大班人咁又幾開心0既，如果第2日唔使返工仲好。聽過我走0左之後成班人都醉晒，睇唔到咁壯觀0既場面都有d可惜。^^如果醉0左齋「無畫面」，唔會「湯」，有時醉下都未嘗唔係好事。

今朝同同事飲早茶(哎﹗又通頂)，都好耐無咁圍埋飲茶0既，當然都係講下d無聊0野，聽得某人0既事跡愈多，加埋平日親身同佢接觸，愈發覺人0既行為真係可以同年齡毫無掛鉤，咁0既年紀應有0既mature你無都算，但係咪講埋做埋d太幼稚0既0野好喎，完全浪費人生閱歷啊﹗

行街發現香港人d衣著品味好似愈來愈「超想像」，其實我都成日覺得好多衫褲鞋都好靚、好有型，但係有時識欣賞就唔代表襯你喎，都要就番自己身形至得0架，即係無理由著衫出0黎獻醜0架，藏拙緊要d﹗

0黎緊星期一要去飲啊，係親愛0既舊同事結婚，到時成team人都要飛去尖咀，所以落0左命令8:00p.m前要搞掂晒所有0野，都係0既，我都想安安落落咁飲，不過星期一就要好早開始狂做，但係為0左俾面又要著靚d，哎呀，好鬼忙啊﹗加油﹗

《搞出0野》

每日都有好多0野想記低，開心0既，想記住，唔開心0既，亦想記住衰得有幾貼地。唔知幾時會厭倦寫blog，就好似6年班開始0既大pet鴨日記，寫下變週記、月記、年記……希望唔會啦，始終上網時時都需要。

星期一，又係忙到仆街0既一日，唔鍾意，特別係當同事一個一個撤退。今日，仲要係公眾假期啊﹗我發覺上星期放0左2日假其實等於無放，上星期2預備定今期做乜，放0左個星期3、4，星期5返工即瘋狂工作，影埋相都夜晚11點半，食埋個飯，12點幾，仲有好多稿未寫……食完飯上0黎發現檯面多0左張memo，老細留俾我0既，叫我可以星期一交都得。當時諗，都好，唔使即時寫，不過中午前交，即係星期6、日要寫啦，好似仲灰﹗搵下資料再寫陣稿都半夜喇……結果假期都係過得戚戚然，因為我知星期一死硬。星期日中秋節訓到好晏，夜晚去0左清水灣，其實都咁大個，對中秋真係無乜特別感覺，又唔鍾意食月餅，以前有得煲下蠟都話好玩d。 都係志在唔屈0係屋企至去沙灘，個個都玩電燈籠，最無聊就係勁玩幼條螢光棒，真係唔係好明有咩咁好玩。我個紙燈籠靚d﹗買0左個蛋形大口仔電燈籠諗住送俾家姐個仔玩，點知唔記得拎，今日至0係公司拎返走。尋日更氣唔太好，只係間歇性見到月光，唉﹗返到屋企又寫0左陣稿，今朝一早又返去寫，我都知我慢慢0地，不過真係好乏啊﹗ 即刻諗起林海峰隻新碟有首《搞出0野》，0岩聽。
「一早起身又唔願起身
返到公司又唔想做0野
對住阿姐 唔想做0黎做去 都係0個0的0野
成副機器 唔想日做夜做 啤啤啤
咁點呢 0下 咁點呢 ……」

夜晚收到前輩電話要急飛公幹，真係開心。我都好想出0下trip……
放工，突然抑鬱，想起好多好多0野， 雖然有時都覺得自己幾幸運，都會識安慰下自己上天係公平0既，無人十全十美。不過，有時眼見太多人太幸福喇，幾咁唔自願都忍唔住眼紅，有d機會我真係好想接觸下，就算唔係垂手可得，可唔可以公平地俾我好努力咁爭取呢？

真係要為自己set個target喇﹗

914

914，生日，最大感覺係， 做0左廿幾年人，有愈來愈多0野要記低、唔想忘記 ，但係又有好多0野想忘記，偏偏做唔到，人愈大精神愈分裂，應該改變不了﹗好耐無upload相上blog，因為我不嬲都係post手提d相，換0左手提之後唔知點解部pc點都sense唔到張memory card，過相好麻煩，不過今次煩d都要up下，始終生日嘛﹗人大0左真係會不由自主無咁著緊生日，不過太若無其事又唔係咁好，始終人生得幾十次生日，長命極咪100個，有期待好過無。

9-11-05 老友夜
同好耐無見0既小學同學見面，見面時間好短，不過都好開心，識0左十幾年仲keep到唔係易事。食0左今年第一個生日蛋糕，迷你，但係都幾好味，可惜太飽，都係食唔晒。Anyway，多謝﹗
12-9-05 乳豬宴
星期一好很忙，12點返到去即喪寫稿，不過都係遲0左交，d價錢啊caption啊好鬼煩，唉﹗寫啊寫，十點幾終於搞掂晒，不過仲有大堆貨未執啊，預0左有排搞﹗下午Jimmy送0左把Minnie Mouse遮俾我，係叫同事0係迪士尼買0既，多謝晒﹗佢仲話佢個妹好like把遮，知道佢送俾人勁扭計，hehe....唔好意思，咁我都係佢aiya阿妹嘛﹗因為公司同事好興搞小型生日會，見到Minnie遮即刻諗起會唔會有人幫我搞呢？但係星期一個個咁忙，but星期二又唔齊人，星期三、四我又放假，唔通星期五？終於12點幾俾星及Maggie拉0左入會議室，照舊係一檯0野食，不過唔見蛋糕。最surprise0既時刻出現喇，大佬抬住隻乳豬入0黎，情景好搞笑，之後班賤男又送束花潤我，明顯係0係留下買、無乜包裝可言0個亭，不過好有心，thanks all of u﹗^O^未試過咁多同事幫我慶祝，第一年出0黎工作0既生日，無乜熟人，未必有同事知我生日。舊年生日0岩0岩好撞著轉工，9月10日同班攝影師&小量同事farewell兼慶生日，之後去0左台灣，15號零晨就同幾個舊同事兼幾個第一次見面0既新同事唱K，食0左個唔知太平洋定大西洋餅店出品0既蛋糕，唔係名牌，不過都好味，多謝。同事愈來愈多，不過對我最好0既，好似都係0個幾個。^U^會議室內都有十幾個人，不過有D只係講過幾句0野，好明顯係局住俾面，最好笑係見到有人黑面，有人就縮係後排擺出事不關己格，是但啦，理得你，唔係太想知點解，你唔俾面我我第日都唔會俾面你咁解。Anyway，多謝買刀、買蛋糕、買零食、買花……總之有heart 0既你﹗

14-9-05 迪士尼
我唔係迪士尼超級擁護者，只係遇著佢12號開，咁我14號生日，我覺得有人陪0既話，當香港又無乜好玩，去下都好應該，況且呢d地方都唔會成日去。都幾好彩，唔多人喎，基本上無0野係要排隊。感覺OK啦，真係好細，不過絕對無D傳媒講到咁衰。我唔係買0左好多0野咋，又唔係去旅行。最開心係免費拎0左呢個襟章，起初都唔知生日有0野送，係見到個所謂"演藝人員"同個細路講生日快樂，我至見到個細路心口有呢個brooch，細問之下原來只要生日就可以免費拎，唔係話好靚0既，不過起碼唔係個個有先啦﹗我估當日有好多條友係趁生日去迪士尼，大家都咁白痴﹗

15-9-05
放假，不過電話依舊排山倒海，好似無放過假咁。

其實，生日最想要乜呢？我都唔知。

尋日---煩躁的星期六

尋晚訓左好多個鐘，多到我好驚今晚訓得唔好，聽朝又要晨早死返去寫稿……訓得好都會灰，真係好灰﹗^^
可能尋日太攰喇，本來星期五晚0既shooting，因各種因素改0左星期六，本來預0左3點搞掂，無所謂啦。頂你，個model遲0左成個半鐘，勁催勁嘈都要成12點半至到，化埋妝加搭車都成2點至去到location，make-up又趕時間走，天氣又熱……好煩躁。本來條女話唔舒服都廢時話佢，之後佢自己又趕又多人打0黎催佢。講講下佢咪話原來之前0個日(星期五)，一放學就開始影幾壇0野，最後0個單影到半夜5點幾啊，天啊，中五咋，唔係要會考0架咩。個樣係幾靚幾sweet，身形亦幾好，但係咁細就搏成咁都幾狼，搏還搏唔好影響到我啦，煩死，成5點至搞掂晒，好鬼"忟"，人0地11點就返0左公司0架嘛﹗星期六啊﹗
因為下星期請0左2日假，所以要快d完成工作，今晚都係要開工0架喇，不過一陣約0左好耐無見0既舊朋友食飯，雖然中學至friend，但係小學已經識0架喇，好耐無見，都好掛住佢0地。時間過得真係快，放學後趕住一齊行街0既日子已經離而家好遠。而家我差唔多日日都趕住行街，不過係為0左工作囉﹗^^

糧頭

月頭，出糧，入錢俾阿媽，計計，都係好似好難儲錢，已經唔係好買名牌0個種，好想儲多d錢。好記得舊年某個月頭，糧頭日子，有人用驚訝0既聲音同我講︰「你唔係俾錢屋企咁激啊？」你老竇老母養到你咁大，唔捨得俾多，都要俾d錢飲餐茶啊，唔俾錢屋企仲激啦，呢d人咪可以買0野買得好激囉，唔使俾錢屋企舊錢襟洗好多0架，至緊要過到自己0個關囉﹗

呢幾日都無乜落雨，心情都ok 0既，無乜太特別0既事發生，星期一又係例通頂，唔知原來早0左入稿，俾老細話0左幾句，算啦，又唔係未話過，都無乜感覺。 細個無玩過Barbie 0既我，繼早兩年卒之收到人生第1隻Barbie之後，早幾日因工作再接觸呢條女。講真唔算冧呢味0野0架，不過呢幾隻Barbie又幾靚喎，今日至知原來$79.9一隻，都幾抵，我諗我會買，哈哈﹗

假面具，愈看愈清楚，野心，都愈來愈明顯，呢種智慧唔0岩我。唔想時刻處於戒備狀態，唔好惹我，pls﹗

恭喜您﹗

難得星期四唔使太"早"走，真係好，但係又難得地公司勁齊人，平日又唔見咁熱鬧，真古怪。
其實本來唔想上網，但有樣0野好想記低，今日收到請帖啊，都幾surprise，因為佢d保密工夫做得好好，而且我0地又唔一齊做0野 呢﹗恭喜晒，自己都開心埋一份，雖然聽講佢同男友拍0左好耐拖，估都估到差不多係時候結婚。不過有時總會覺得，呢個好人朋友雖然年紀比我大d、而且學識好廣，但係佢成日都會講d好低能又好好笑0既0野，睇樣同埋見佢d白痴0野一定以為佢好細個。9 月尾擺酒，成件事好似好急咁啊，而且9月係你生日、又係結婚月、仲有係我生日月，你話係咪幾忙先。
Anyway，多謝佢0既邀請，亦好希望佢得到幸福，好老套，不過認真0架﹗

滔滔不絕

成半個月無成blog喇，因為懶？唔知啊﹗不過有時早0左返屋企都可以無啦啦四、五點至訓，慣0左累事。無寫blog0既日子無乜太特別0既事發生。都係咁啦，一個星期總有幾日超忙，但係都有幾日係free咁啦，其實我諗樓下看更會好想知我做乜，成日三更半夜返0黎，但係個樣又成個細路女咁，無可能係0個d啦，唔知佢會唔會有日忍唔住問我做盛行，如果真係0既話，答佢我做看更啦不如。

好似有好多0野想記錄低，希望個blog永遠唔會close啦……

今日同一個讀帕時無乜兩句、但係因工作撞番反而好多0野傾0既朋友食lunch，約0左大半年喇，終於食得成。對佢認識唔算深，估唔到佢會同我講幾多我認為都幾私人0既0野，幾surprise，聽見佢對將核0既計劃、滔滔不絕0既行動，以及極其積極0既預備工作，突然幾欣賞咁有planning 0既人，咁又係，年輕唔努力等幾時，但係咁樣0既生活會唔會迫得自己太緊呢？自問自己都算一個幾努力0既人，但係對未來0既計劃好似真係無乜頭緖，有時會諗自己都好後生0者，試0下先啦，但係可以試幾耐呢？從另一個角度諗，我而家做0既一切都係對將來有用0架，咁又係，都唔知自己講乜……其實是唔知想點。^^我諗我都係鍾意逃避0既人。

「點解你好似成日都咁辛苦命0既？」關心我0既前輩問。我都唔知點答。唔係想懶慘，而係真係無乜點享受過他人0既扶持、應該係無話乜會益我，好做0既0野永遠唔會輪到我。乜都要靠自己一手一腳爭取，唔知有無人會以為我爭0野做，其實，只係我唔容許得過且過，"hair"唔落，所以要努力搵0野做，我0既處境係，機會只靠自己，哈哈，不過真係好似無乜機會。從來我好似無乜好恨上咩位上到咩post 0既寬大理想，唔想做廢人0者，唉……

W話︰「如果生女，我希望佢好可愛，唔使生得咁靚……」「咩邏輯啊你？」「生得靚會好容易自大，好難教，佢會以為自己好叻，以為全世界都錫佢……」唔知點答。邊個唔想生得靚？出0左0黎做0野，更看清以貌取人係約定俗成，好樣，條路真係易行好多。唔會妒忌生得靚0既人，只要唔影響我就得，靚唔代表無內涵，好可惜見得太多空有外在美0既人。都有遇過樣靚人品又好0既人，都好可惜，佢0地會以為自己好醒，以為樣靚係得人鍚0者，成功全憑夠charm，自吹自擂少不了。人生在世其實有學唔完0既0野，有幾charm唔係用把口講，哈﹗

怨氣好似好重啊呵？其實我心情又唔係差0既，有感而發0者。

人靚會自以為事，呢味我都睇到化化0地喇，最驚係根本唔靚，但係以為係「世界之最」0個d「世界之最膚淺」0既人。朋友最近好傷心，我都為佢而心噏，當佢係阿哥咁0架。自問睇0野都幾公平0既，唔會因為單方面0既說話就隨便憎一個人，不過接觸過「0個個人」，一早感受到「0個個人」0既selfish、childish，唔睇好0架，不過當局者迷呢樣0野好難講，希望朋友真正有個新開始，「0個個人」唔好再傷害佢啦。唔識珍惜珍惜自己0既人，好傻。衰d講句，「0個個人」將來一定後悔。

都係0個句，希望所有朋友每一日都咁開心，享受每一日。好老套啊，吹啊﹗