乜都影

今日都係有得早閃^v^)，歸途中車外都係落狗屎，"熬"下"熬"下好自然都係訓著，好衰啊，無啦啦電話響嘈醒人，望一望，架車唔係好多人，情況都係一人霸一孖坐位，點解呢？到底點解個個人(我都係)有得揀都唔會揀同其他人坐？啊，我真係好想知點解。點解一有人坐埋0黎，本來"獨佔"0既位無0左就會唔自然呢？

星期六睇0左《朱古力獎門人》，星期日半夜仲睇埋明珠台播0個套71年version添﹗睇完0個陣其實有好多感覺，不過家陣又唔係咁想講。當然，05年版比71年版精彩，現代人睇慣特技無法啦。不過，Johnny Depp好似真係老0左好多啊……
睇完朱古力，就去0左食朱古力，係一間叫Relaxing tea 唔知乜Chocolate garden 0既小店，之前未幫襯過，試0左個甜品列車，都ok喎，份量唔多但又可以試幾款，嘻嘻，特別係件chocolate cake及choco mosse杯，好味﹗我又食喇，大大碌……意外發現甜品店附近有條"波點之路"好靚，其實係因為夜晚要慳電所以開少d燈0者。

早幾日同一前輩討論旅行事宜，原來佢都想去西藏，我都想，不過未打算咁年輕去。其實我都有諗過可以同佢去，但係估唔到佢驚喎，驚女朋友誤會。男女同行真係咁大問題咩？有個照應0者，總覺得自身清白唔使驚。呢d男友真係唔話得，咁自率咁有分寸，都0岩0既。

好鍾意乜都影一餐，但係我無屬於自己0既相機，真正有用時都係問大佬借，因為買0左就一定會每日都拎出街，但我又慣0左每日拎好多0野出街，如是者咪重到爆？所以用手提影相算數。我部手提就快瓜柴喇，等緊換機。本來好想繼續追隨Nokia，不過呢排Nokia d機唔太靚仔，價錢亦同功能、賣相唔多成正比，所以我變心喇……

仲有2日又放假，加油啊﹗

雲

其實都返0左屋企2個鐘左右，搞下搞下又未訓，打埋呢幾隻字仔要碌去訓喇．
今日突然有幾個comments，算多喇，thanks大家，其實我只想真正係我朋友0既人睇我個blog，好彩暫時都係，(^w^)無閒人。唔掂，眼訓啊，下次再講啦﹗
04年9月11日0既天好清、雲好白……
好想搭下飛機……主要係想睇下雲，離開下香港。

平淡的一天

平淡0既一日，無乜特別事發生，同之前0既星期3一樣，傾完稿後閃得，又趕得切出去食飯，yeahhh，真開心。雖然對多好人0黎講，9點幾10點放工應該算食宵夜，不過對我0黎講，係星期1 至5之中最早食晚飯0既一日。今日飲0左好鍾意0既蘋果汁、仲食埋甜品，大鑊……
其實原來今晚係小圈子大學同學聚會，不過0係好離奇0既情況下，我0係開席至知。無損失0既，一直都覺得大學0個3年過得唔多開心，真正算得上朋友應該只有2、3個，其他真係只可叫做classmates，唔明點解可以咁，當然一方面因為有道「牆」將我同身邊人隔離，另一方面，我都會諗係唔係自己有問題？定係浸會有問題？不過畢業後結識0左好多個0黎自浸會0既人，又完全玩得埋甚至好好傾，可能係我同呢個系唔夾啦。
我發覺我個袋真係裝得大多0野，重到爆炸之餘，入面d 0野又成日凸晒出0黎，今日就差少少 趺0左個Casper鎖匙扣，好彩發現得早，咁cute唔見0左就好Q唔抵喇。頭先嘗試拎D材料出0黎整飾物，不過一起動始發覺最靚0個包珠仔及其中一樣重要零件漏0左0係公司，頂，收工。
記性好似愈來愈唔好，所以有空寫下blog都0岩0架喇。

虛榮

因為工作需要，「虛榮」 呢個詞寫得多，虛榮0既人同事見得更多。 撫心自問自己有時都算虛榮，因為好多時我都相信名牌有品質保證，貴0野通常唔差得去邊，但係我絕對唔係名牌奴隸， 至起碼我唔會好恨好恨LV，欣賞唔代表要擁有。做人有適當0既虛榮都唔係唔好，因為虛榮0既人通常唔會待薄自己，但係千祈唔好膚淺，將所有名牌擺上身就好型咩？著得貴唔代表有品味0既。早前上網見到呢對新0既Gucci BB鞋仔，係好鬼得意啊，但係BB使唔使咁潮啊？著0個個 都唔知自己威，其實係有錢人要面，想個B都懶潮至會買，教懷細路﹗
好耐之前已經睇見《朱古力獎門人》0既poster，但係又唔係太覺有傳媒大講，所以就無乜留意。直到今朝拎0左份免費報紙，搭車時睇0左《朱古力獎門人》0既簡介，至察覺原來戲名叫《Charlie And The Chocolate Factory》，即係我好細個0個陣好鍾意睇0既一本故事書，我睇0個本0既譯名叫《查理與巧克力工廠》，我真係cheap，而家至知。細個真係好鍾意呢本書0架，我都而家都仲keep住唔捨得掉，但係就同d陳年珍藏放埋一齊，唔知收0左0係邊個box呢，所以呢套戲睇硬，雖然咁0既Johnny Depp 唔係我杯茶，hehe……不過同事話我知我至知道呢套戲係翻拍，無計啦，1971年上《兒童樂園》（Willy　Wanka　and　the　Chocolate　Factory）0個陣我都未出世。
諗諗0下我咁鍾意食朱古力，可能係細個迷《Charlie And The Chocolate Factory》0既後遺症，如果一生人真係可以見到咁神奇0既朱古力工廠，都幾虛榮。

都係你0地cute d﹗

貓鼠一窩

其實我一直唔太捨得入戲院睇卡通，總覺得好似好唔抵，懂性以來0係大銀幕睇卡通應該只有幾次，不過今日唔知點解，興之所至走0左去睇《多啦A夢--大雄與風之使者 》，可能因為以前好鍾意睇叮噹大長篇漫畫，所以仍感覺良好，嘻嘻。
講開卡通，就諗起Hello Kitty同Mickey Mouse，因為迪士尼就快開、又因為迪士尼對手Sanrio大家姐Kitty由上年到今年仲搞緊30大壽， 與此同時因為工作需要，我成日要接觸、留意呢孖貓與老鼠0既動向，可能因為我都唔算係佢0地fans，我諗唔止我，讀者都難免有d膩意，最好佢0地兩個自傷殘殺消失一排啦﹗ 再講開又講，其實Disney卡通人物之中，Pinocchio同Tinkerbell仲得意過Mickey，而Sanrio 0既XO同埋我追隨0左十幾年0既大pat鴨Pekle都肯定cute過Kitty啦﹗ 都咁大個喇，而家唔會勁迷勁買呢d cutie 0野，不過有時就算睇見都開心，可能以前無乜閒錢買呢d 無謂0野都係好事，起碼唔會因為擁有過剩而變得麻木，有d 0野我到而家都仲好恨0架……

情意結

張相好曚，攝於上星期某夜晚11點幾，剛食完飯，環境黑暗加上我係用手提遠距離拍攝，曚，但係都幾mood幾型啊﹗佢0地係其中一部份好同事， 其實而家呢份工比以前做得開心d，都幾關佢0地事，佢0地真係幾好0架，特別係當你由中午一直做做做到夜晚，但係知道仲有排做0既時候，可以咁樣一大班人落街食0下飯，吹下水，歇一歇後精神會好d，所以有得揀我都唔想叫外賣，不過好難至會咁齊人。其實而家返工係唔係真係開心呢？又好似……

上星期為0左整右手面0個舊0野(當然為工事)，一個星期去0左2次汝洲街，好耐無去過喇﹗其實0個度都幾好行，可能因為我好鍾意飾物之類0既野，我仲買0左d材料DIY，不過擺0左成個星期都未得閒整，我要努力﹗

上星期朋友送盒半島0既月餅俾我，講真真係好好食，分0左4個俾人，自己屋企0個4個都好快消失0左。今日佢又送多盒俾我，唔知點解今年食親都有d唔舒服喎，oh，真正無福消受，hehe……thanks﹗可能因為我老竇阿媽成日話因為我0係around中秋節出世，間接因為咁所以幫我改呢個名(^=^)…嗚嗚…，不過我都真係對中秋節有d情意結0既，係一個會認真諗搞咩好0既節日，除0左中二定三0個年0係中秋節唔見0左個銀包0既慘痛經歷。唉﹗

勇

好耐無update了，咁就8月喇﹗
呢排我開始逐步入侵大佬間房，自從佢搬0左出去住，我成日都留0係佢房上網、睇書、睇電視、做0野……最近搬埋入0黎訓添，呢種佔有慾唔算過份吧？好想好想認真徹底地執一次屋，不過，唔請番2日假都唔掂。

頭先行出房攞水飲，好奇怪地發現成地都係水，而且仲"nup nup"地，潮濕都唔係咁啊，我肯定入房之前又無0架噃，搞0左一倫，發現原來係放0係地0個個哈密瓜爛0左仲穿埋，所以漏到一地都係哈密瓜水，騎呢到極。跟手又要拖乾淨個地，麻鬼煩。

尋日同一舊同學通電話，好耐無佢消息了，知道佢好似去0左西藏，原來真係，仲要係上海->四川->西藏->尼泊爾，獨個兒足足浮0左成2個月。個名有個勇字0者，唔使真係咁勇啊？其實，都羨慕0架，可以放低香港一切，一個人去體驗生活，講起上0黎已經漂亮，做到就更加唔容易。 再者，今日同一個因工作而認識0既朋友食lunch，可以叫做朋友吧，聽下佢之前0係英國0既生活，唔詳細0架，不過聽少少已覺得精彩。人真係要周圍去下至得。我都好想，不過暫時無可能，人生有咁多0野牽絆住，點走？不過我信有一日可以0既，幾日好、幾個月仲好，希望我有機會咁勇啦﹗

呢排有時都總係好攰好攰，但又訓唔到。不過，我發現當我拎早前買落本小說出0黎睇睇，睡意就會返番0黎，唔係因為本書悶，而係佢係令人有0野諗0個種，諗下諗下就想訓喇。係陳慧0既《愛情戲》，睇0左1/3咋。