天氣好

好攰，唔知做乜今日好攰，不過攰極一陣都要煲一陣《Engine》，其實同事借0左俾我一陣子，但係我上星期日至開始睇。其實我以前好鍾意睇本村0既劇，我唔迷佢，但係總覺得佢有份型格、味道。而家個個鍾意睇韓劇，咁我都會睇，不過韓劇往往係生離死別再哭乾眼淚型，相比之下，日劇通常言情之餘仲會帶出人生道理，睇完有仲好多0野諗。暫時0黎講《Engine》好似唔錯，鍾意劇中孤兒院0既故事骨幹，幾touching，好耐未追過戲，仲唔趁早返追追點掂，如果我係OL就可能一早煲完。

呢排天氣好，其實心情都ok，可惜0既係愈看清某d人和物，愈覺失望。我欣賞人有自信，有信心至會做得好。不過有d人自信過度、永遠好似0係世界中心呼喚「我好醒﹗得我至掂﹗」即變膚淺。我唔想知咁多0野……

張相攝於上星期，時間係黃昏，地點係悶爆影樓，向下望，比起望住影樓4度牆舒暢得多。

荒謬

周遭發生0既荒謬事愈來愈多，嘗試以自己太憤世0既角度去睇，可能係我太保守0者，諗真真係唔係喎，唯有盡量令自己睇化，好明顯自古膚淺的人多的是，所以就有「自以為是」、「面蒙心精」、「假仁假義」、「笑裡藏刀」、「假公濟私」……等簡單明快道出壞人劣行0既四字成語出現，我只希望自己不會變得荒謬。
前日同舊同事見了一個短面，時間真係好短，短到基本上講唔到d乜。不過睇見佢個樣精神、亦流露對現況0既滿意，我都好開心。我知佢有睇呢個blog，thx﹗我又唔似d激情人咁post埋d激情相、肉麻語錄、爆咸古……難得你都捧場，有heart啊果然﹗其實有時半夜當身邊已經無乜人剩低，就會有幾掛住你0既感覺(好老套啊﹗)(^o^)，因為以前你係我0既宵夜良伴。我估有人會覺得我有時留得夜，係因為份人"hea"兼工作效率低，但係我認為你會明白我囉，我真係做0野0架。處女座萬歲﹗
突然好想食日本0野，訓醒即諗去邊度食好﹗再一次，Happy Sunday﹗

離奇失眠

尋日，唔係，係今朝，返到屋企6點幾，其實都有6個鐘訓0架，但係好離奇地，攰到癲0既我居然訓唔著，碌到10點幾都仲眼光光已經好想死，我估最後我只係訓0左2個鐘左右，點解會咁？所以今日成個人都幾彷彿，好彩，下晝抽獎抽到美心雙黃白蓮蓉月餅，話晒舊幾水，開心番dd啦﹗做埋少少公事之後，我就去0左買新鞋，開心，唔係話超鍾意0既，但係想買鞋好耐，都未遇到0岩心水，呢對夠特別，頂住先﹗然後，去0左買生日蛋糕、生果、零食…生日同事過0左今晚都只係21歲咋，真係young。雖然我都唔係好大，不過都唔young喇，時間過得真係快……

鏗鏘集

又一個極度懶洋洋0既sunday下午，狂訓11小時之後換0黎0既尚算係飽滿0既精神but呆滯0既神情，個樣越訓越殘，haha﹗
尋日夜晚去0左西貢一轉，唔知點解我好鍾意久唔久就去下西貢、赤柱、離島之類0既地方，通常無太special0既目的，係貪佢0個種遠離dd市區0既「偽渡假」feel0掛﹗好多次去西貢都會見到artist，今次都唔例外，見到原來唔係好黑又唔係好大舊0既劉青雲，縱然都幾有魅力，但係見住d人湧埋去同佢影相又會覺得好好笑，人0地買外賣0者，都要嬉皮笑臉對住你班友仔，辛苦晒﹗

曾幾何時，我成日行書店、煲小說，好多人都覺得奇怪，因為我講粗口、個人又粗魯、仲成日吱吱喳喳……總之同人講親其實我嗜好係睇書，得到0既回應通常係「唔係啊你﹗」、「唔似喎﹗」、「粗口大全啊？」……是但啦。其實我咩書都睇、偵探小說、愛情小說、翻譯小說、散文、繪本、烹飪、旅遊書咩都0岩，不過中學時期，老套地同好多「少女」一樣，最常睇愛情小說，又曾幾何時，最鍾意睇最mass 0既張小嫻。第一次睇佢0既書無記錯係96年0既事喇，0個陣佢未算勁紅，再過一兩年，睇愛情小說好似已經等於一定要睇張小嫻。好多人話因為佢0既名氣而睇，睇0左之後咪不外如事，如果從文學價值睇，張小嫻0既書無可能係文學巨著，但係我幾buy佢0個種貼身易入屋感覺，好似《鏗鏘集》咁將事實呈現，每次睇完佢0既書都會吐出一句︰人生就係咁﹗不過我近幾年已經無以前咁迷喇，佢一出書我都唔會即刻買、買0左亦未必會即刻睇。上個星期就俾我摷到本早幾個月買落0既《月夜寶石》，每日臨訓睇dd咁，終於睇完，原來同之前0個本《吸血盟》一樣玩魔幻feel，係唔係因為而家d人太迷信、又或者係《Harry Potter》太成功所以都要出d魔法系列應市？唔緊要啦，想講0既係呢個嘗試都算幾好，因為《鏗鏘集》式愛情故事猶在，只係多0左副導人迷信0既寶石魔牌諷刺人類0既貪婪、不知足0者﹗

今個星期又去0左書店一轉，其中一本收穫係今個月出街0既《我在雲上愛你》，書名好老套啊，所以都掙扎0左一陣買唔買好，最後都拎坎0左，0岩0岩睇埋最後一個單元喇，其實最好睇都算係呢part。唔知係唔係因為故事由十幾歲開始講起，我覺得張小嫻已經唔太捉得住0個種情懷，有少少失手。用南亞海嘯做高潮，斷估係當日0既災難令佢靈感即時爆發要寫部咁0既愛情小說，再一次話俾人知咩叫天意弄人。最後幾頁0既插畫好肉酸，亦令人睇得好心酸。

路

而家係星期六朝早7點幾，返到屋企無即刻訓，唔知點解，可能係唔捨得、亦可能係太飽喇﹗尋日成個晏畫不停做做做、趕趕趕，好很攰。頭先同d同事食0左少少0野，如果唔係，而今應該都會餓。呢3張相係頭先回程時，沿途用mobile影0既，落巴士後如果等唔到的士，就要步行10-15分鐘返歸，都幾遠。要留低回味0既唔係平平無奇風景， 而係望住呢段長長0既回家之路，仲要係人都唔多隻，總有種講唔出0既感覺，又舒服、又孤獨……

大碌

又是一個在家的星期四零辰，yeahhh!
雖然出到去食飯地方已經9點半，對其他人0黎講算好夜，但係對我0黎講，咁"早"食飯&咁"早"放工實在值得開香檳啦﹗
呢幾日夜晚都鍾意睇少少書至訓，又真係好訓喎，有時仲有好夢發添﹗
今日工作都幾順利，又撞0岩同事可以一齊食個「tea飯」，雖然都係忙0架，但只要情緒唔係處於勁作戰狀態，感覺特別relax。不過我發覺自己好似又肥左d喇，大碌﹗夜間工作，真係好難避免勁食，好似前日星期一我做到星期二朝早六點幾，雖則只係淨番我一個，無人陪，但係成7、8個鐘無食0野，肚餓又怕訓唔著，都係頂唔順自己走去邊"咪《便利》"邊食早餐……oh my god﹗

久違了

前幾日執執下0野，摷到呢本舊年9月去台灣0個陣買落0既書，擺0左成大半年都未睇，無辨法，鬼叫0係台灣返0黎第2日已經開工，未做完0既0野依然未做，甚至當日轉工搬返屋企0既一大箱 「遺物」都未執好，睇見就頭痕……本書叫《Fashion Market》，係作者走訪倫敦市集Spitalfield's Market 16位artists0既圖文紀錄，當日買呢本書好大程度因為d相好吸引，令人有種好強烈想去0個個地方0既感覺。未睇晒本書啊，不過一向唔太鍾意Q&A形式咁睇interview。總覺得唔夠in-depth。不過照相睇班artists0既作品亦好得意，當中Simon Basher 既公仔印象最深，可愛亦有性格，邊個話豆豉眼、O形咀就唔特別啊﹗http://www.basherworld.com/ 我未去過英國，好想去，希望唔需要等太耐啦﹗希望去0個陣天下太平啦﹗都幾羨慕作者，讀ST.MARTIN、又係懶人最鍾意扮0既FREELANCE DESIGNER、30歲未夠可以出書，雖然講人唔係講自己，起碼叫做作者，不過呢一切好大程度上都係建基於金錢，仲要係老竇搵0個D……
錢唔係萬能，但係無錢會令人感到自己好無能。
HAPPY SUNDAY﹗

星期三真好

星期三真係好，係全個星期最唔需要趕頭趕命0既一日，even星期六、日都要爭取時間休息、玩、見盡想見0既人，busy﹗諗諗下，爭分奪秒0既日子原來已經開始0左好耐，其實，太唔捨得浪費時間係好攰0架，點好呢？

上星期終於將《電車男》讀完，講真呢種structure 0既小說可以用極少時間睇完，不過每日睇dddd咁，有乜辦法唔耐。又講真，唔覺得勁好睇，不過有窩心位、有笑位、有共鳴位，可能已經好夠。只係覺得，基本上係將電車男同愛瑪士成個邂逅過程「小事化大」化，咁之後又點呢？結構太薄，雖不致意猶未盡，但係我想知多d囉﹗

前日收到好友的短訊，痛心。
事實證明，人善真會被人欺。你所講0既我都明白，其實，自從上次聽你講，預0左結局係咁，問題係邊個先發制人0者。你天生容易寬恕人、易心軟、又唔識拒絕人，呢d十幾年前識你已知好大鑊，係優點、亦係最易被攻陷之處。唔怕話你知，我真係好想打去鬧臭個仆街，向來都唔太鍾意佢、如今佢竟然咁蝦你，我好嬲，不過我諗我打去小佢你會更嬲，算啦﹗工作、朋友當然可以將一個人改變，你一直睇見、只係一直逃避去接受，當你無信心、唔信任、坦誠不再，一切都係假。事到如今，應該換個角度諗，慶幸唔使再浪費時間0係唔珍惜自己0既人身上，早好過遲，無蝕。今次，無論如何唔好再心軟。
最好0既關心方法，我諗係唔去煩你，都係0個句，我信因果，睇下佢第日點。總之想搵我就搵啦，唔使唔好意思，我忙一定會出聲0架喇﹗振作啊﹗
我朋友唔多，希望每個都幸福。

有排唔到你

唔開心，頭先打0左好很大篇blog，一時個網有問題，無0左，好傷心，唔寫喇……

「一切都埋晒位霸晒山頭有排唔到你」呢句好中point，所以我而家都開始後悔了，要再想一想。