一周年

應該要到復活所至可以完結網吧生涯，因為大佬0個陣至得閒幫我整電腦。唔係一定要上網，不過有d 0野一定要update至得，而且，又慣0左夜訓呢，其實今晚特登早走，想聽日早d起身，落車都係覺得要上下網至安落。

尋晚未到十二點已經走0左，因為下午上0左山影相，行0左條超勁斜0既路上山，再之前0個晚又唔多夠訓，人都癲。突然發現其實今個星期除0左呢份儲稿，仲有好多0野要handle，頭都痛埋，唔想諗喇，逃避下先，所以尋晚都好好訓。今日罕有地全家去0左鯉魚門食海鮮，上星期老竇贏馬所以佢請，平過0係西貢、布袋澳食好多喎﹗之後家人返歸打牌，我去左尖咀行陣、買小小0野加食個糖水，半夜再過Jimmy生日party。某d聚會變0左質，就會少0左出席，點解下下要劈到成pat屎咁至心息，都咁大個人，不過為慶祝為開心又唔同講法，Jimmy生日一定到，佢咁錫我，睇見佢而家個女友對佢咁好我都好安落，都話佢會等到0架啦。坐0左陣就走喇，佢都醉0左喇，又好似冇咩搞，閃，想早d休息，不過閃0左去上網。真係要同自己講聲有冇搞錯﹗

一直堅持自己唔鍾意余宜發0，不過佢播0既歌又真係ok，好多好耐無聽而又有情意結0既歌都會出現，前排播我細個0個陣最鍾意聽0既Debbie Gibson《Lost In Your Eyes》已經好厲害，前幾晚又點醒我要買藤田惠美隻新碟《CAMOMILE PLUS 精選 + 新曲 》，好耐之前聽過佢翻唱"英文老歌"已經覺得幾正，不過0個陣只聽過一兩首，想想下又唔記得。事隔一大排，藤田惠美下個月0黎香港開concert，乘機出呢隻新曲+精選，又咁岩俾我聽到余宜發播0左大半隻碟，今次要買喇，唔敢話好好聽，而係佢把聲令人覺得好舒服，一個人靜靜地聽幾好，仲幾催眠……

忠言係咪一定逆耳？唔知啊，有時都知自己0既說話太直接，而且會幾難入耳，忽略聽0個個0既hard feeling。但係如果把口只可以講d對方鍾意聽0既說話、佢想我答0既答案，咁會唔會枉為朋友呢？就係因為知道人住住容易當局者迷，企0係身邊0個個既然客觀d，直接d唔係好d咩？我永遠支持我0既朋友，但係做唔到一味附和。算啦，有時太一廂情願唔係好事，關心，唔代表有人會珍惜，有點失望，決定以後唔理咁多，免得更失望，只要自己知道忠言逆耳就得喇。

撇徐工作上0既死結，最近心情都ok 0既，希望繼續有運行。
原來開0左個blog都成年喇，一周年喇，我都一樣咁長氣﹗